विराटनगर/ आगामी भदौ ११ गते मङ्गलवार निस्किने राधाकृष्ण रथ यात्रालाई भव्य र सुरक्षित बनाउनका लागि विराटनगर महानगरपालिकाले विशेष तयारी गरेको छ। महानगरपालिकाले यस वर्षको रथ यात्रालाई व्यवस्थित र सुरक्षित बनाउन विभिन्न पक्षहरूमा ध्यान केन्द्रित गरेको जानकारी दिएको छ।

 

पछिल्ला वर्षहरूमा रथ यात्राको क्रममा तारहरूसँग सम्बन्धित समस्या देखिएको थियो। यस वर्ष महानगरपालिकाले यो समस्या समाधान गर्न रथको मार्गमा पर्ने सबै तारहरूको व्यवस्थापन गरिसकेको छ। मेयर नागेश कोइरालाले यसले रथ यात्रालाई अझ सुरक्षित बनाउने बताएका छन्।

 

कुनै अप्रिय घटना घटेमा तत्काल उद्धार गर्नका लागि महानगरपालिकाले लाइफगार्ड अस्पताल, मोरङ सहकारी अस्पताल, नोबल अस्पताल, विराट नर्सिङ होम र महानगरपालिकाका २ वटा एम्बुलेन्ससहितको उद्धार टोली तयारी अवस्थामा राखेको छ। साथै, एम्बुलेन्स संघसँगको सहकार्यमा थप एम्बुलेन्सहरूसहित स्वास्थ्यकर्मीहरूको टोली पनि तयारी अवस्थामा रहने जानकारी स्वास्थ्य संयोजक दिलीप कुमार यादवले दिएका छन्।

यस वर्षको रथ यात्रामा सरसफाई र फोहोर व्यवस्थापनलाई पनि विशेष महत्व दिइएको छ। महानगरपालिकाले यात्रा मार्गको सरसफाई र फोहोर व्यवस्थापनका लागि १५० जना कर्मचारीहरू परिचालन गर्ने भएको छ। सरसफाई व्यवस्थापन शाखा प्रमुख पुनम कुमार दाहालले यसबारे जानकारी दिएका छन्।

विराटनगर महानगरपालिकाले यस वर्षको राधाकृष्ण रथ यात्रालाई सुरक्षित, व्यवस्थित, र सफा बनाउन गरिएका यी प्रयासहरूले यात्राको सफलतामा महत्वपूर्ण भूमिका खेल्ने अपेक्षा गरिएको छ। महानगरपालिकाले यस वर्षको रथ यात्रा शान्तिपूर्ण र भव्य रूपमा सम्पन्न होस् भन्ने कामना गरेको छ।