विराटनगर/हिन्दु महिलाहरुको विशेष पर्व हरितालिका तीजको सुरुवात आज दर खाने दिनबाट हुँदैछ। तीजको व्रतको अघिल्लो दिनको रुपमा महिलाहरु दर खाएर व्रतका लागि शारीरिक र मानसिक तयारी गरिरहेका छन्।

तीज पर्व विशेषगरी नेपाली महिलाहरुले मनाउने प्रमुख पर्व हो, जसमा माइतीले चेलीबेटीलाई बोलाएर दर खुवाउने परम्परा रहेको छ। दरमा मुख्यत: दूधबाट बनेका शुद्ध परिकारहरु खाने गरिन्छ, जसले व्रतका दिन शक्ति प्रदान गर्ने विश्वास छ।

व्रत लिने महिलाहरु भोलि निराहार बस्नुपर्ने भएकाले आज दर खाएर व्रतलाई सफल बनाउनका लागि शरीरमा पर्याप्त ऊर्जा संकलन गर्छन्। आज दर खाएपछि तीज पर्व औपचारिक रुपमा सुरु भएको मानिन्छ र यो पर्व ऋषि पञ्चमीसम्म विविध विधिबाट मनाइन्छ।

तीजको प्रमुख दिन हरितालिका तृतीयामा व्रत बसिन्छ भने चौथीका दिन गणेशको पूजा गरिन्छ। अन्तिम दिन, पञ्चमीमा अरुन्धती सहित सप्तऋषिको पूजा गरी तीज पर्व समापन गरिन्छ।