सप्तरी / सप्तरीको हनुमानगर कंकालनी नगरपालिका वडा नं. १, भारदहमा माइक्रोबसको ठक्करबाट १५ महिने बालक आदर्श अधिकारीको मृत्यु भएपछि स्थानीयले सडक अवरुद्ध गरेका छन्। राजविराजबाट विराटनगरतर्फ जाँदै गरेको प्रदेश १–००२–००१ज ३८६६ नम्बरको माइक्रोबसले आदर्शलाई ठक्कर दिएपछि गम्भीर घाइते भएका बालकको उपचारको क्रममा विराटनगरमा मृत्यु भएको हो।
दुर्घटनापछि आक्रोशित स्थानीयले सडकमा टायर बालेर विरोध प्रदर्शन गरेका छन्। मृतक बालकका आफन्त र स्थानीयहरुले ठक्कर दिने सवारीलाई सप्तरीमा ल्याउनुपर्ने, चालकलाई ज्यान मार्ने मुद्दा चलाउनु पर्ने, तथा पीडित परिवारलाई १० लाख क्षतिपूर्ति दिनुपर्ने माग राखेका छन्।
त्यसैगरी, स्थानीयहरुले कोशी ब्यरेजदेखि मोहली पुलसम्म गाडीको गति सीमित गर्ने, टाइम कार्ड लागू गर्ने, र जेब्रा क्रस बनाउने माग गरेका छन्। कंकालनी मन्दिर क्षेत्रभित्र प्रहरी बिट निर्माणको माग पनि उठाइएको छ।
सप्तरी प्रहरीले स्थानीय मागहरू सम्बोधन गरी सहमतिको प्रयासपछि सडक अवरोध खुलाइएको जानकारी दिएको छ।