विराटनगर /झापाको बिर्तामोड–१० ठुटेबरमा मोटरसाइकल दुर्घटनामा परी चालकको मृत्यु भएको छ। गएराति करिब ८:३० बजे बिर्ताबजारबाट सैनिकबजारतर्फ जाँदै गरेको प्र१–०१–०१२ प ५८९१ नम्बरको मोटरसाइकलले विपरित दिशाबाट आइरहेको साइकलयात्रीलाई जोगाउने प्रयास गर्दा आफैं अनियन्त्रित भई पल्टिएको थियो।

दुर्घटनामा परी मोटरसाइकल चालक, बिर्तामोड–१० निवासी २७ वर्षीय अनिस न्यौपाने गम्भीर घाइते भएका थिए। टाउको र दुबै खुट्टामा गम्भीर चोट लागेको न्यौपानेलाई उपचारका लागि बीएण्डसी हस्पिटल पुर्याइएको थियो। तर, उपचारकै क्रममा आज दिउँसो २ बजे उनको मृत्यु भएको जिल्ला ट्राफिक प्रहरी कार्यालय झापाले जनाएको छ।

मोटरसाइकलमा पछाडि सवार, सोही ठाउँका ३८ वर्षीय टिकाराम राय भने सामान्य घाइते भएका छन्। उनको बीएण्डसी अस्पतालमै उपचार भइरहेको छ। दुर्घटनामा प्रयोग भएको मोटरसाइकल अस्थायी प्रहरी चौकी सैनिकबजारको नियन्त्रणमा रहेको छ।

ट्राफिक प्रहरीले दुर्घटनाबारे थप अनुसन्धान गरिरहेको जनाएको छ।