विराटनगर /साफ महिला च्याम्पियनसिप २०२४ अन्तर्गत सेमिफाइनलमा नेपालले भारतलाई पेनाल्टी शुटआउटमा पराजित गर्दै फाइनलमा स्थान सुरक्षित गरेको छ। आइतबार काठमाडौंको दशरथ रंगशालामा भएको यस रोमाञ्चक खेलमा विवादका कारण खेल दुई पटकसम्म रोकिएपछि अन्ततः १७८ मिनेटको लम्बाइमा पुगेको थियो। खेल एक-एकको बराबरीमा टुंगिएपछि निर्णय पेनाल्टी शुटआउटमार्फत लिइएको थियो, जसमा नेपालले चार गोल गर्दा भारतले दुई गोलमात्रै गर्न सक्यो।

नेपाल र भारतबीचको यो दोस्रो साफ सेमिफाइनल प्रतिस्पर्धा हो। यसअघि सन् २०२२ मा दशरथ रंगशालामै भएको सेमिफाइनल खेलमा पनि नेपालले भारतलाई हराएको थियो, तर फाइनलमा नेपाल बंगलादेशसँग पराजित भएको थियो। यसपटक भने नेपाल पहिलो पटक साफ महिला च्याम्पियनसिपको उपाधि जित्ने लक्ष्यमा अघि बढेको छ।

आजै सम्पन्न पहिलो सेमिफाइनल खेलमा बंगलादेशले भुटानलाई ७-१ को विशाल अन्तरले पराजित गर्दै लगातार दोस्रो पटक फाइनलमा स्थान बनाएको छ। अब नेपाल र बंगलादेशबीचको फाइनल खेल बुधबार दशरथ रंगशालामा हुनेछ।

नेपालको लागि यो फाइनल जितेर पहिलो साफ उपाधि जित्ने अवसर मात्र नभएर बंगलादेशसँगको गत वर्षको पराजयको बदला लिने मौका पनि हुनेछ।