विराटनगर /अर्घाखाँचीको भूमिकास्थान नगरपालिका–६, खिल्जीमा देउसी भैलो खेलिरहेका एक समूहलाई बसले ठक्कर दिँदा दुई जनाको मृत्यु भएको छ भने ३३ जना घाइते भएका छन्।

सोमबार बेलुकी वडा नम्बर ५ र ६ को सिमाना जयठाँटीमा ना ३ ख २४७१ नम्बरको बसले देउसी भैलो नाचिरहेको समूहलाई एक्कासि ठक्कर दिएको हो। घटनामा २२ वर्षीया तारा श्रेष्ठ र ७० वर्षीया रुनी खनालको ज्यान गएको जिल्ला प्रहरी कार्यालय अर्घाखाँचीका प्रमुख डिएसपी चक्र बहादुर मल्लले जानकारी दिए।

घाइतेमध्ये गम्भीर अवस्थामा रहेका ९ जनालाई लुम्बिनी प्रादेशिक अस्पताल, बुटवल पठाइएको छ। अन्य ८ जनाको अवस्था मध्यम रहेको र १६ जनाको अवस्था सामान्य रहेको अस्पतालका मेसु डा. जगन्नाथ तिवारीले जानकारी दिए।

प्युठानबाट भैलो खेल्न आएका यात्रु बोकेको बसको ब्रेक फेल हुँदा दुर्घटना भएको प्रहरीको भनाइ छ। घटनापछि स्थानीय र प्रहरी मिलेर उद्धार कार्य गरेका छन् भने दुर्घटनाबारे थप अनुसन्धान भइरहेको प्रहरीले जनाएको छ।