विराटनगर/ जिल्ला प्रहरी कार्यालय कास्कीको हिरासतमा रहेका राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछानेसहित चारजनालाई आज अदालत लगिँदैछ। सहकारीको रकम अपचलन, सङ्गठित अपराध, र सम्पत्ति शुद्धीकरण मुद्दामा पक्राउ परेका उनीहरूलाई म्याद थपका लागि कास्की जिल्ला अदालत पेश गरिने भएको हो।
लामिछानेसँगै पूर्वडीआईजी छविलाल जोशी, लिला पछाई, र व्यवसायी रामबहादुर खनाल पनि प्रहरी अनुसन्धानका लागि अदालत लगिँदैछन्। यसअघि अदालतले कात्तिक ४ मा ५ दिन, कात्तिक ८ मा ७ दिन, कात्तिक २० मा १० दिन, र कात्तिक २५ मा १३ दिन म्याद थप गरेर अनुसन्धान गर्न अनुमति दिएको थियो।
यसबीच, रवि लामिछानेलाई अनुसन्धानका लागि रुपन्देही समेत लगिएको थियो। बुटवलस्थित सुप्रिम सहकारीका २० करोडभन्दा बढीको बचत रकम हिनामिना मुद्दामा प्रहरीको टोलीले लामिछानेसँग चार दिनमा करिब २२ घण्टा बयान लिएको थियो।
उनीहरूमाथि सहकारीको रकम अपचलन र सङ्गठित अपराधका गम्भीर आरोप लागेका छन्। प्रहरी अनुसन्धानपछि थप प्रमाण जुटाउने प्रयास भइरहेको छ। अदालतमा म्याद थप भएपछि मुद्दाको कानुनी प्रक्रिया अघि बढ्ने बताइएको छ।
सम्बन्धित पक्षले उनीहरूमाथि लागेको आरोप अस्वीकार गर्दै निष्पक्ष छानबिनको माग गरेका छन्। अहिले देशभर यो मुद्दाले व्यापक चासोको विषय बनेको छ।