विराटनगर/ झापाको दमकमा प्रधानमन्त्री केपी शर्मा ओलीलाई कालो झण्डा देखाउने क्रममा पक्राउ परेका पहिचानवादी समूहका ११ जना नेता र कार्यकर्तालाई प्रहरीले आइतबार साँझ रिहा गरेको छ।

प्रदर्शनका क्रममा पक्राउ परेका केदार धिमाल, मातृका धिमाल, विक्रम वनेम फागो, एल.बी. पालुङ्वा, सोम चेम्जोङ (फोराहाङ), गगा राई शेर्मा लगायतलाई इलाका प्रहरी कार्यालय दमकले दिनभर नियन्त्रणमा लिएर साँझ रिहा गरेको हो।

रिहाइपछि पहिचानवादी नेता-कार्यकर्ताको समूहले प्रधानमन्त्री ओलीविरुद्ध चर्को नाराबाजी गर्दै कोण सभा आयोजना गरेको थियो। कोण सभामा उनीहरूले कोशी प्रदेशको नामाङ्कन अस्वीकार्य रहेको भन्दै पुनः नामाङ्कनको मागसहित आन्दोलनलाई निरन्तरता दिने घोषणा गरेका छन्।

कोण सभालाई सम्बोधन गर्दै पहिचानवादी नेता डकेन्द्रसिंह थेगिमले कोशी प्रदेश खारेज नगरेसम्म संघर्ष जारी रहने चेतावनी दिए। उनले पहिचानको रक्षा गर्न सङ्घर्षलाई थप सशक्त बनाउने प्रतिबद्धता व्यक्त गरे।

यस घटनाले प्रदेश नामाङ्कनप्रति असन्तुष्ट जनतालाई थप आन्दोलनमा उक्साउन सक्ने देखिएको छ।