विराटनगर/ कीर्तिपुरस्थित त्रिवि क्रिकेट मैदानमा मंगलबार नेपाल प्रिमियर लिग (एनपीएल) अन्तर्गत दुई महत्त्वपूर्ण खेलहरू हुँदैछन्।

बिहान ९ बजे हुने पहिलो खेलमा चितवन राइनोज र लुम्बिनी लायन्स प्रतिस्पर्धा गर्दै छन्। चार खेल खेलिसकेको चितवन तीन जितसहित ६ अंकका साथ तालिकाको तेस्रो स्थानमा छ। त्यसैगरी, कप्तान रोहित पौडेलको नेतृत्वमा रहेको लुम्बिनी लायन्सले अहिलेसम्म जितको खाता खोल्न सकेको छैन। लुम्बिनीले आजको खेलमार्फत लिगमा आफ्नो उपस्थितिको प्रभाव देखाउन खोज्नेछ।

दिउँसो १ बजे हुने दोश्रो खेलमा कर्णाली याक्स र पोखरा एभेन्जर्स भिड्नेछन्। कर्णालीले चार खेलमध्ये दुई जित र दुई हारका साथ ४ अंक बटुलेको छ र तालिकाको चौथो स्थानमा छ। पोखरा एभेन्जर्स भने तीन खेल खेल्दा दुई हार र एक जितका साथ २ अंकमा सीमित छ।

दुवै खेल टोलीहरूको लागि महत्त्वपूर्ण मानिएको छ। चितवन आफ्नो विजयी लयलाई कायम राख्न चाहन्छ भने लुम्बिनी जितको खोजीमा छ। उता, कर्णाली आफ्नो स्थान बलियो बनाउने प्रयासमा छ भने पोखरा अन्तिम चारमा पुग्न संघर्षरत छ।

त्रिवि मैदानमा आजको खेलहरूले लिगको तालिका थप रोचक बनाउने अपेक्षा गरिएको छ।