विराटनगर / एसीसी यु–१९ महिला एसिया कप क्रिकेट प्रतियोगितामा नेपालले आफ्नो पहिलो खेल आज पाकिस्तानसँग खेल्दैछ। नेपाल र पाकिस्तानबीचको खेल मलेसियामा नेपाली समयअनुसार दिउँसो ११:४५ बजे सुरु हुनेछ।
नेपालले यस खेलमा बलियो पाकिस्तानलाई हराउने लक्ष्यसहित मैदानमा उत्रिने तयारी गरेको छ। आईसीसी यु–१९ महिला टी–२० विश्वकप छनोटको विजेता बनेर यो प्रतियोगितामा स्थान बनाएको नेपालले दुई हप्ता लामो अभ्यासपछि प्रतिस्पर्धामा उत्रन लागेको हो।
नेपालको टिममा सिनियर टिमका अनुभव प्राप्त खेलाडी पुजा महतो, सोनी पाख्रिन, साना प्रविन, र कृष्मा गुरुङले आफ्नो उत्कृष्ट प्रदर्शन गर्ने अपेक्षा गरिएको छ। टिमको आत्मबल उच्च राख्दै प्रतिस्पर्धीलाई कडा चुनौती दिने रणनीति बनाइएको छ।
पाकिस्तानी टिम जुफसान आयाजको कप्तानीमा बलियो देखिन्छ। जुफसानको आक्रामक पारी खेल्ने क्षमता र २०२३ को विश्वकप खेलेका हइना अहमर र कुरातुलैनजस्ता अनुभवी खेलाडी पाकिस्तानका मुख्य ताकत हुन्।
नेपालले घरेलु मैदानमा दुई हप्तासम्म तयारी गरेपछि गत शुक्रबार मलेसिया प्रस्थान गरेको थियो। बलियो प्रतिस्पर्धीसँग खेल्दै टिमले आगामी आईसीसी यु–१९ विश्वकपको तयारीसमेत गर्ने लक्ष्य लिएको छ।
आजको खेलले नेपालका युवा खेलाडीहरूको क्षमता परख गर्न अवसर प्रदान गर्नेछ। नेपाली टिमले राम्रो प्रदर्शन गर्दै एसीसी यु–१९ महिला एसिया कपको सफलता प्राप्त गर्ने अपेक्षा गरिएको छ।