भोजराज घिमिरे -मोरङ, जेठ ३१ –
नेपाली राजनीतिमा निष्ठा, त्याग र आदर्शको प्रतीक मानिने वरिष्ठ नेतृ शैलजा आचार्यको १६औं स्मृति दिवस शुक्रबार मोरङको जहदा गाउँपालिका–१ स्थित कृष्णप्रसाद कोइराला सेवा गुठी तथा शैलजा आचार्य स्मृति पोलिटेक्निकको आयोजनामा विविध कार्यक्रमसहित भव्य रूपमा सम्पन्न गरिएको छ।

कार्यक्रममा सहभागी वक्ताहरूले आचार्यले देश र जनताको हितमा देखाएको निडर नेतृत्व, असल चरित्र र दूरदर्शी सोचको उच्च मूल्यांकन गर्दै समसामयिक राजनीतिमा पनि तिनै गुणहरू आवश्यक रहेको औंल्याएका थिए।

राजनीतिक मार्गनिर्देशनको प्रतीक शैलजा आचार्य

कार्यक्रमका प्रमुख वक्ता नेपाली कांग्रेसका केन्द्रीय सदस्य तथा कोशी प्रदेशसभा सदस्य अमृत अर्यालले आफू शैलजा आचार्यबाट नै प्रेरित भएर राजनीतिमा लागेको स्मरण गरे। उनले आचार्यद्वारा स्थापना गरिएको स्मृति पोलिटेक्निकले देशका विपन्न तथा ग्रामीण भेगका विद्यार्थीहरूलाई गुणस्तरीय प्राविधिक शिक्षा उपलब्ध गराउँदै आएको चर्चा गर्दै संस्थाको आर्थिक अवस्था कमजोर रहेको र सरकारको ध्यानाकर्षण आवश्यक रहेको बताए।

उनले भने, “शैलजा आचार्यज्यूको योगदान केवल राजनीतिक मात्र नभई सामाजिक रूपान्तरण र शिक्षाको पहुँच विस्तारतर्फ पनि अमूल्य छ।”

लोकतन्त्रको आधारशिला राख्ने नेतृ

नेपाली कांग्रेसका पूर्व केन्द्रीय सदस्य गुरुराज घिमिरेले शैलजा आचार्यको योगदानलाई “लोकतन्त्रको आधारशिला राख्ने व्यक्तित्व”को रूपमा स्मरण गर्दै देशको राजनीतिक, शैक्षिक र सामाजिक रूपान्तरणमा उहांको भूमिकालाई कहिल्यै भुल्न नसकिने बताए।

राष्ट्रिय विकासका दूरगामी योजना अघि सारेको स्मरण

कोशी प्रदेशसभा सदस्य गयानन्द मण्डलले शैलजा आचार्य उपप्रधानमन्त्री तथा अन्य मन्त्री रहेका बेला अगाडि सारेका दीर्घकालीन योजनाहरूले मुलुकको पूर्वाधार तथा विकास प्रक्रियालाई गति दिएको चर्चा गरे। उनले शिक्षामा गरिएको लगानी भविष्यका लागि टिकाउ जग बसाल्ने काम भएको बताए।

राज्यको संरक्षण आवश्यक भएको सुझाव

नेपाल पत्रकार महासंघ कोशी प्रदेश उपाध्यक्ष कुमोद अधिकारीले लोकतन्त्र स्थापनामा योगदान पुर्‍याएका व्यक्तित्वहरूको स्मृतिमा स्थापना गरिएका संस्थाहरूलाई राज्यले औपचारिक संरक्षण र सहयोग गर्नुपर्ने औंल्याए। उनले यस्ता संस्थाहरू शिक्षाको विकास, इतिहास संरक्षण र युवा पुस्ताको मार्गनिर्देशनमा सहायक हुने बताए।

स्थानीय सरकारको निरन्तर सहयोग

जहदा गाउँपालिकाका अध्यक्ष जितेन्द्रप्रसाद साह र धनपालथान गाउँपालिकाका अध्यक्ष जिवछ गच्छदारले स्मृति पोलिटेक्निकका लागि पालिकाबाट हरेक वर्ष छात्रवृत्ति कार्यक्रम तथा सञ्चालन खर्चका लागि बजेट विनियोजन गर्दै आएको जानकारी दिए। उनीहरूले स्थानीय तहबाट शिक्षा क्षेत्रमा गरिएको सहयोगलाई अझ प्रभावकारी बनाउन प्रतिबद्धता जनाए।

पोलिटेक्निकको भूमिका र विस्तार

पोलिटेक्निककी अध्यक्ष मिता आचार्य र प्रिन्सिपल सन्तबहादुर अधिकारीले शिक्षालयले पूर्वदेखि पश्चिमसम्मका विद्यार्थीहरूलाई प्राविधिक शिक्षा प्रदान गर्दै आएको जानकारी दिए। उनले संस्थाले राष्ट्रिय स्तरमै प्राविधिक जनशक्ति उत्पादनमा योगदान दिँदै आएको र दीर्घकालीन सोचसाथ सञ्चालन गरिएको बताए।

कार्यक्रमका अन्य पक्षहरू

कार्यक्रममा सेवा गुठीका कोषाध्यक्ष मोहलाल महतो, सदस्य विकास पराजुली, पत्रकार महासंघ मोरङ अध्यक्ष सुसिला पाठक, पोलिटेक्निकका अधिकृत भुपाल गिरीलगायतको सक्रिय सहभागिता रहेको थियो।

स्मृति दिवसका अवसरमा वृक्षारोपण कार्यक्रम, स्मृति मन्तव्य, विद्यार्थी सहभागिता, तथा शिक्षालयको भविष्य योजना सार्वजनिक गर्ने कार्यक्रमहरू समेत सञ्चालन गरिएको थियो।

कार्यक्रमको सञ्चालन पोलिटेक्निकका अधिकृत भुपाल गिरीले गरेका थिए ।