कटहरी हुलाकी सडकमा ४ वर्षमा १७% प्रगति : ठेकेदारको धरौटी कटौती गर्दै काम अघि बढाउने निर्णय
मोरङ, साउन १३ – मोरङको कटहरी खण्डअन्तर्गतको हुलाकी राजमार्गमा निर्माण कार्य सुरु भएको चार वर्ष बितिसक्दा पनि जम्मा १७ प्रतिशत मात्र प्रगति भएको पाइएको छ। २०७८ सालमा श्रेष्ठ कन्स्ट्रक्सनले जिम्मा लिएको ६ किलोमिटर सडक खण्डको काम पटक–पटक आश्वासन दिए पनि सुस्त गतिमा चलिरहेको भन्दै स्थानीय बासिन्दा आक्रोशित बनेका छन्।
सडकको निर्माण अलपत्र पारिएको भन्दै सर्वदलीय र सर्वपक्षीय नागरिक समाज, स्थानीयवासी तथा पीडितहरूले पटक–पटक आन्दोलन, धर्ना, सडक अवरोधजस्ता कार्यक्रम गर्दै आवाज उठाउँदै आएका छन्। तर म्याद २०८२ साल जेठ ३० गते सकिँदासम्म पनि अपेक्षित प्रगति नभएपछि अब ठेकेदारलाई पुनः म्याद नथप्ने निर्णय गरिएको छ।
यसै सन्दर्भमा सोमबार मोरङका प्रमुख जिल्ला अधिकारी इन्द्रदेव यादवको अध्यक्षतामा सम्पन्न बैठकले ठेकेदार कम्पनीको धरौटी रकम कटौती गर्ने निर्णय गरेको छ। साथै, हाल जीर्ण अवस्थाको सडकलाई तत्काल ग्राभेल र रोलरमार्फत हिँड्न मिल्ने बनाउने निर्देशन दिइएको छ।
बैठकमा प्रतिनिधिसभा सदस्यहरू, राजनीतिक दलका प्रतिनिधि, नागरिक समाजका अगुवा मृत्युन्जय झालगायत सरोकारवाला निकायहरूको उपस्थिति रहेको थियो। बैठकको निर्णयप्रति नागरिक समाजले स्वागत व्यक्त गरेको छ।
स्थानीय बासिन्दाहरूले भने, “हामी वर्षौं धूलो र हिलोमा हिंड्न बाध्य भयौं। अब पनि यदि काम अघि बढेन भने हामी अझ सशक्त आन्दोलन गर्न बाध्य हुनेछौं।”