होस्टल व्यवसायी संघ मोरङको दोस्रो साधारण सभा सम्पन्न, नयाँ सात सदस्यीय कार्यसमिति गठन
बिराटनगर,
होस्टल व्यवसायी संघ नेपाल, मोरङ जिल्ला कार्यसमितिको दोस्रो वार्षिक साधारण सभा तथा प्रथम अधिवेशन शनिबार बिराटनगरस्थित अरागोन स्कूल एण्ड होटल म्यानेजमेन्टमा सम्पन्न भएको छ।

संघका केन्द्रीय उपाध्यक्ष भीम भण्डारी प्रमुख अतिथि रहेका कार्यक्रममा विशेष अतिथिमा वडा नं–१० का अध्यक्ष अर्जुन गिरी, हिकमतबहादुर थापा र अधिवक्ता हरिप्रसाद लुइटेलको उपस्थिति थियो।
अध्यक्ष सागर शर्मा फुयालको अध्यक्षतामा सम्पन्न अधिवेशनले सर्वसम्मत निर्णयमार्फत सात सदस्यीय नयाँ कार्यसमिति गठन गरेको छ। जसमा अध्यक्ष सागर शर्मा फुयाल, उपाध्यक्ष बिनी भण्डारी, सचिव बिबेक यादव, सह–सचिव दिपक श्रेष्ठ, कोषाध्यक्ष नरेश यादव, सदस्यमा श्रीजना श्रेष्ठ र सन्तोष गजुरेल चयन भएका छन्।

यसैगरी अधिवेशनले युके महारानी गर्ल्स होस्टल, युमा महारानी गर्ल्स होस्टल, दरबार ब्वाइज होस्टल, ज्योति गर्ल्स होस्टल र प्रभा गर्ल्स होस्टललाई नयाँ सदस्यका रूपमा स्वागत गरेको छ।
कार्यक्रममा बोल्ने वक्ताहरूले होस्टल व्यवसायलाई व्यवस्थित, पारदर्शी र विद्यार्थी हितमुखी बनाउन सुझाव दिएका थिए। विशेष अतिथि अर्जुन गिरीले वडास्तरबाट कानुनी र प्रशासनिक सहजता दिलाउने प्रतिबद्धता जनाउँदै विद्यार्थीको हितमा सधैं जिम्मेवार रहने आश्वासन दिएका छन्।
कार्यक्रमको सञ्चालन संघका सचिव बिबेक यादवले गरेका थिए।