बुढीगंगामा अन्तर–वडा स्तरीय फुटबल प्रतियोगिता सम्पन्न, ३२ उत्कृष्ट खेलाडी छनोट

मोरङ,
मोरङको बुढीगंगा गाउँ युवा परिषद्को आयोजनामा “तीन युग, तीन नेतृत्व : विगत र वर्तमान स्थानीय नेतृत्वको सम्मान” भन्ने मूल नारासहित अन्तर–वडा स्तरीय फुटबल प्रतियोगिता भव्यतापूर्वक सम्पन्न भएको छ।
मिति २०८२ जेठ १३ गतेदेखि २१ गतेसम्म सञ्चालन भएको प्रतियोगितामा गाउँपालिकाका ७ वडा र १३ विद्यालयमार्फत प्रतिनिधित्व गर्ने गरी ८ टिम सहभागी भएका थिए। यसअघि बैशाख २४ गतेदेखि वडा स्तरीय छनौट प्रक्रिया सुरु गरी अन्ततः पालिका स्तरीय टिम निर्माण गरिएको थियो।
प्रारम्भिक चरणमा २ सय खेलाडी प्रतिस्पर्धामा उत्रिएका थिए। तीमध्ये उत्कृष्ट प्रदर्शन गर्ने ३२ जनालाई पालिका स्तरीय फुटबल टिमका लागि छनोट गरी शनिबार औपचारिक रूपमा गाउँपालिकालाई हस्तान्तरण गरिएको हो।
अखिल नेपाल फुटबल संघ (एन्फा) को नियमअनुसार छनोट प्रक्रिया सम्पन्न गरिएको आयोजक परिषद्का अध्यक्ष पुजेश कोइरालाले जानकारी दिनुभयो।

छनोट भएका खेलाडीहरू:
महेश मगर, सुरेश तिम्सिना, नवदिप दर्नाल, अभिषेक मगर, आयुश्तम खवास, रोहन बस्नेत, बिक्रम बुढाथोकी, रोहन महर्जन, संगीत बि.क, धिरज उराउ, प्रतीक आले मगर, आभास माझी, गौरभ चौधरी, सागर कुमार चौधरी, धिरेन सरदार, मोहम्मद आलम, हेमराज कट्वाल, सरोज सिक्दार, आरभ माझी, आशिष भगत, सिध्दर्थ चौधरी, रिजन चौधरी, अर्जुन चौधरी, सुजित कुमार चौधरी, रक्की चौधरी, र सन्तोष कुमार चौधरी।

प्रतियोगिता समापन कार्यक्रममा नेतृत्व सम्मान विशेष आकर्षण रह्यो। “तीन युग, तीन नेतृत्व” नाराअनुसार पालिकाभित्रका ऐतिहासिक नेतृत्वकर्तालाई सम्मान गरिएको थियो।

साविक डंग्राहा गा.वि.सका पूर्व अध्यक्ष अशोक रिजाल

साविक टंकीसिनवारी गा.वि.सका पूर्व अध्यक्ष भुवनेश्वर मण्डल

उनीहरूलाई खादामाला, दोसल्ला र सम्मानपत्रद्वारा सम्मान गरिएको हो। साथै, उपस्थित अतिथि, जनप्रतिनिधि र कर्मचारीलाई खादा र सद्भावको कोसेलीद्वारा स्वागत–सम्मान गरिएको थियो।

बुढीगंगा गाउँपालिकाका अध्यक्ष जितनारायण थापा मगरले युवा पुस्ताको व्यक्तित्व विकास गर्ने र उनीहरूलाई कुलतबाट टाढा राख्ने उद्देश्यले फुटबल टिम गठन गरिएको बताए।
“८ वर्षदेखि विभिन्न उमेर समूहलाई समेटेर क्लब बनाएर प्रशिक्षण सुरु गर्ने तयारी गरेका छौं,” उनले भने। गाउँपालिकाले टिमका लागि प्रशिक्षक (कोच) र डाइट व्यवस्थापन समेत गर्ने जानकारी दिए।
आर्थिक सहयोग र प्रतिवेदन
१२ लाख रुपैयाँको सहयोगमा सम्पन्न प्रतियोगिताको समापन कार्यक्रममा प्रगति प्रतिवेदन, आय–व्यय विवरण तथा छनोट खेलाडीहरूको नामावली पत्रकार सम्मेलनमार्फत सदस्य–सचिव कृष्ण प्रसाद भट्टराईले सार्वजनिक गरेका थिए।

आयोजक समितिले यस प्रतियोगिताबाट युवा खेलाडीहरूको क्षमता उजागर हुने र उनीहरूलाई ठूलो स्तरका प्रतियोगितामा सहभागी हुन मार्ग खुल्ने विश्वास व्यक्त गरेको छ।