सात दिनदेखि धर्ना दिइरहेका उखु किसानले आन्दोलन थप सशक्त पार्ने घोषणा

काठमाण्डौ, भदौ १४।
सात दिनदेखि माइतीघरमा धर्ना दिइरहेका उखु किसानहरूले आन्दोलनलाई थप सशक्त बनाउने घोषणा गरेका छन्। शनिबार माइतीघरमै पत्रकार सम्मेलन गर्दै उखु उत्पादक महासंघले आगामी भदौ २५ गतेदेखि राष्ट्रिय राजमार्गहरू अनिश्चितकालीन अवरुद्ध गर्ने चेतावनी दिएको हो।

महासंघले त्यस दिन सर्लाहीको हरिवनमा उपस्थित भई आन्दोलनलाई निर्णायक चरणमा पुर्‍याउन सबै किसानलाई अपिल गरेको छ।

किसानहरूले सरकारले बाँकी अनुदान रकम विना सर्त तत्काल भुक्तानी गर्नुपर्ने र उखुको मूल्य तोक्दा किसान प्रतिनिधिको सहभागिता सुनिश्चित गर्नुपर्ने माग अघि सारेका छन्। महासंघका अनुसार कृषि मन्त्रीसहितको सरकारी वार्ता टोलीसँग तीन पटकसम्म वार्ता भए पनि कुनै निष्कर्षमा पुग्न सकेको छैन।

यसपटक सरकारको बजेट (रातो किताब) मा २ अर्ब रुपैयाँ समावेश भए पनि किसानलाई उपलब्ध हुनुपर्ने रकम गैरजिम्मेवार ढङ्गले कटौती गरिएको किसानहरूको आरोप छ। यो कदमलाई उनीहरूले ‘निन्दनीय’ भनेका छन्।

‘सरकार भनेको आम जनताको अभिभावक हो, तर पटक–पटक मेहनती किसानलाई धोका दिनु भनेको किसानको आत्मसम्मानमा ठेस पुर्‍याउनु हो,’ महासंघले जारी गरेको विज्ञप्तिमा उल्लेख छ।