विराटनगरमा महिला सहकारीकर्मीको गोष्ठी : “विराटनगर घोषणापत्र” जारी, सुशासन र महिला नेतृत्वमा जोड
विराटनगर । मोरङको सहकारी क्षेत्रमा महिलाहरूले अब नेतृत्व सम्हाल्ने स्पष्ट संकेत दिएका छन् । जिल्ला सहकारी संघ लिमिटेड मोरङको आयोजनामा शुक्रबार विराटनगरमा सम्पन्न एकदिवसीय “महिला सहकारी गोष्ठी, २०८२” ले सहकारी अभियानलाई नयाँ दिशामा लैजाने प्रतिबद्धतासहित “विराटनगर घोषणापत्र” सार्वजनिक गरेको छ ।
गोष्ठीमा सहभागी सयौं महिला सहकारीकर्मीहरूले सहकारी क्षेत्रलाई पारदर्शी, दिगो र विश्वासिलो बनाउने अठोट व्यक्त गर्दै लैङ्गिक समानता र महिला सशक्तीकरणलाई केन्द्रमा राख्ने घोषणा गरेका हुन् । “मर्यादित सहकारी, समुन्नत समाज” भन्ने नारालाई व्यवहारमै उतार्ने प्रतिबद्धता जनाउँदै उनीहरूले सहकारीको मूल्य, मान्यता र सिद्धान्तलाई कडाइका साथ लागू गर्ने जनाएका छन् ।
सहकारीप्रति बढ्दो अविश्वास हटाउन विशेष पहल
पछिल्लो समय सहकारी क्षेत्रप्रति बढ्दो नकारात्मक धारणा चिर्न सदस्य शिक्षा, तालिम र जनचेतनामूलक अभियान सञ्चालन गर्नुपर्नेमा जोड दिइएको छ । साथै, भ्रामक गतिविधिमा संलग्नलाई कानुनी दायरामा ल्याउन र समस्याग्रस्त सहकारीका बचतकर्तालाई राहत दिन सरकारसँग माग गरिएको छ ।
महिला अब संख्या मात्र होइन, निर्णयकर्ता पनि
घोषणापत्रमा महिलाको संख्यात्मक मात्र नभई गुणात्मक सहभागिता सुनिश्चित गर्नुपर्ने, नीतिगत तथा निर्णय तहमा महिलाको पहुँच विस्तार गर्नुपर्ने र वैकल्पिक नेतृत्व विकासमा जोड दिइएको छ ।
मन्त्री मन्सुरीको प्रतिबद्धता : बजेट आउँछ, महिला सशक्त बन्छन्
कार्यक्रमका प्रमुख अतिथि कोशी प्रदेशका उद्योग, कृषि तथा सहकारी मन्त्री इस्राईल मन्सुरीले महिला सशक्तीकरणका लागि प्रदेश सरकार प्रतिबद्ध रहेको बताएका छन् । उनले सहकारी क्षेत्रमा महिलाको संख्या उल्लेख्य भए पनि नेतृत्व तहमा अझ प्रभावकारी उपस्थिति आवश्यक रहेको उल्लेख गर्दै आवश्यक बजेट विनियोजन गरिने बताएका छन् ।
राष्ट्रिय सहकारी महासंघको योजना : महिला सम्मेलन हुँदै
राष्ट्रिय सहकारी महासंघका कार्यवाहक अध्यक्ष रमेश पोखरेलले सहकारी क्षेत्रमा महिलाको भूमिका निर्णायक बन्दै गएको बताउँदै आगामी जेठमा महिला सहकारी सम्मेलन आयोजना गरिने जानकारी दिए । उनले सहकारीमार्फत समाज रूपान्तरणमा महिलाको योगदान महत्वपूर्ण रहेको स्पष्ट पारे ।
प्रश्न अझै उही : निर्णय तहमा महिलाको पहुँच कति ?
प्रदेश सहकारी रजिष्ट्रार भुपेन्द्र खनालले सहकारीमा महिलाको संख्या बढी भए पनि निर्णय प्रक्रियामा उनीहरूको प्रभावकारी भूमिका कत्तिको छ भन्ने प्रश्न उठाएका छन् । उनले ३३ प्रतिशत महिला सहभागिताको व्यवस्था भए पनि व्यवहारमा यसको प्रभावकारिता परीक्षण हुनुपर्ने बताए ।
तीन सय बढी सहभागिता, गम्भीर बहस
हिमा मैनालीको अध्यक्षतामा सम्पन्न कार्यक्रममा ३०० भन्दा बढी महिला सहकारीकर्मीहरूको उत्साहजनक सहभागिता रहेको थियो । कार्यक्रममा चित्रा कुमारी थाम्सुहाङ्ग र लक्ष्मीप्रसाद उप्रेतीले सहकारीमा लैंगिक समानता, नेतृत्व र सुशासनका विषयमा कार्यपत्र प्रस्तुत गरेका थिए ।
समग्रमा, विराटनगरमा आयोजित यो गोष्ठीले सहकारी क्षेत्रमा महिलाको भूमिका केवल सहभागितामै सीमित नरहने, अब नेतृत्व र निर्णयको केन्द्रमा पुग्ने संकेत दिएको छ ।