विराटनगर/विश्व हिन्दू परिषद नेपाल कोशी प्रदेशले आज विराटनगरमा बाङ्गलादेशमा हिन्दू धर्मावलम्बीहरूमाथि भइरहेको ज्यादती र अत्याचारको विरोधमा एक प्रदर्शन आयोजना गरेका छन्।
कोशी प्रदेशका विभिन्न जिल्लाबाट आएका सयौँ हिन्दू धर्मावलम्बीहरूले विराटनगरको मुख्य सडकमा जुलुस निकाली बाङ्गलादेश सरकारको ध्यानाकर्षण गराएका छन्। प्रदर्शनकारीहरूले बाङ्गलादेशमा हिन्दू धर्मावलम्बीहरूको सुरक्षाको माग गर्दै विभिन्न नारा लगाएका थिए। जुलुस विराटनगरको पंचमुखी हनुमान मन्दिरबाट सुरु भई सिडिओ कार्यालयमा टुङ्गिएको हो, जहाँ उनीहरूले ज्ञापन पत्र बुझाए।
विश्व हिन्दू परिषद नेपाल कोशी प्रदेशका अध्यक्ष संयोजक देवेन्द्र गुप्ताले बाङ्गलादेशमा हिन्दू धर्मावलम्बीहरूमाथि भइरहेको अत्याचारलाई मानवता विरोधी कार्यको रूपमा आरोप लगाउँदै अन्तर्राष्ट्रिय समुदायसँग बाङ्गलादेशमा हिन्दू धर्मावलम्बीहरूको सुरक्षाका लागि पहल गर्न आग्रह गरे।
नेपाल सोनार फाउण्डेशनका अध्यक्ष महेश कुमार स्वर्णकारले बाङ्गलादेशका हिन्दू समुदायलाई एकजुट रहन, सतर्कता अपनाउन, र विश्व समुदाय तथा मानवअधिकारकर्मीहरूलाई बाङ्गलादेशमा हिन्दूहरूको संरक्षणका लागि एकजुट भएर कार्य गर्नको अपील गरे।
