विराटनगर/ सडक क्षेत्रमा खुल्ला छाडा पशुहरूको कारणले आवत-जावतमा समस्या सिर्जना भइरहँदा सवारी दुर्घटनाको जोखिम पनि बढेको छ। यस समस्याको समाधानका लागि बिराटनगर महानगरपालिकाले तीव्र कदम चालिरहेको छ।

नगर प्रहरी प्रमुख राजन पौडेलका अनुसार, असार मसान्तसम्ममा महानगरपालिकाले १४४ बाख्रा, २४ गाई, १ राँगा, र २१ साँढेलाई नियन्त्रणमा लिएको छ। छाडा पशुहरूको कारणले सडक दुर्घटनाको जोखिम बढ्नका साथै सार्वजनिक सम्पत्तिमा क्षति पुग्ने समस्यालाई ध्यानमा राख्दै, महानगरपालिकाले यस्ता पशुहरूलाई नियन्त्रणमा लिई पशु धनीहरूलाई कारबाही गर्ने नीति लागू गरेको छ।यसका साथै नलगिएका पशु चौपाया हरुलाई लिलामी प्रक्रियामा लैजाने गरेको पौडेलले बताए ।

नियन्त्रणमा लिइएका पशुहरूलाई छोड्नका लागि बाख्राको ५०० रुपैयाँ, गाईको २००० रुपैयाँ, राँगा र साँढेको २५०० रुपैयाँ जरिवाना तोकिएको छ। पछिल्लो वर्ष समातिएका साढे गोरुहरूलाई कोशी टप्पु क्षेत्र तर्फ ट्रक भाडामा लिएर पुर्याएको र अन्य गाई वस्तुहरुहरुलाई विभिन्न गौशालामा राखिएको नगर प्रहरी प्रमुख पौडेलले जानकारी दिए। 

महानगरपालिकाले छाडा पशुहरूको समस्या समाधान गर्दै सहरलाई स्वच्छ र व्यवस्थित बनाउन निरन्तर प्रयास गर्ने लक्ष्य लिएको छ।