विराटनगर/ कोशी प्रदेशका मुख्यमन्त्री हिक्मतकुमार कार्कीले शुक्रबार आफ्नो १०० दिनको उपलब्धि सार्वजनिक गरेका छन्। कार्की २०८१ बैशाख २७ गते मुख्यमन्त्री नियुक्त भएका थिए र साउन ३२ गते १०० दिन पूरा गरेका छन्। उनले १०० दिनमा ६० वटा काम सम्पन्न गरेका छन्।
कार्कीको नेतृत्वमा भएको कोशी प्रदेश सरकारले धेरै महत्वपूर्ण परियोजनाहरू सम्पन्न गरेका छन्। यीमध्ये धनकुटाको भेडेटारमा स्काई वाक निर्माण, कोशी प्रदेशको खोप सुनिश्चितता, चिनसँगको किमाथाङ्का नाका पुनः सुचारु, ‘हेलो सी.एम.’ सार्वजनिक सुनवाई प्रणाली लागू गर्नाका साथै आर्थिक वर्ष २०८१/०८२ को वार्षिक नीति, कार्यक्रम र बजेट स्वीकृतिका उपलब्धिहरू रहेका छन्।
नेपालको राजनीतिक परिप्रेक्ष्यमा, १०० दिनको अवधिलाई विशेष अवसरको रूपमा लिइन्छ। नेकपा माओवादी केन्द्र कोशी प्रदेश सरकारबाट बाहिरिएपछि कांग्रेस-एमाले गठबन्धनको सहयोगमा मुख्यमन्त्री कार्कीको सरकार एकल रूपमा सञ्चालन भइरहेको छ।
कार्कीको १०० दिनको उपलब्धि सार्वजनिक कार्यक्रममा कोशी प्रदेशका मन्त्री, सांसद, मुख्य सचिव केदारनाथ शर्मा, विभिन्न मन्त्रालयका सचिव, र मुख्यमन्त्रीका आर्थिक सल्लाहकार डा. मोहन सुवेदी सहभागी भएका थिए।