सुनसरी/ सशस्त्र प्रहरी बलले नेपाल-भारत सीमा क्षेत्रबाट २ सय ३८ किलो गाँजा बरामद गरेको छ। सुनसरी जिल्लाको भोक्राहा नरसिंह गाउँपालिकास्थित हुलाकी राजमार्गमा सशस्त्र प्रहरीले बोलेरो गाडी (बा ९ च ७१६६) सहित ठूलो परिमाणमा गाँजा बरामद गरेको हो।

 

सशस्त्र प्रहरी बल बिओपी लौकहीका इन्स्पेक्टर आवेश पुन र सुरक्षा बेस क्याम्प भुटहाको टोलीले उक्त गाँजा बरामद गरेको जानकारी दिएका छन्। बोलेरो गाडीमा राखेर उल्टी नाकामार्फत भारततर्फ लैजाने तयारीमा रहेको अवस्थामा प्रहरीले गाँजा नियन्त्रणमा लिएको हो।

 

बरामद गरिएको गाँजा र गाडीलाई थप कारबाहीका लागि नेपाल प्रहरीलाई जिम्मा लगाइएको इन्स्पेक्टर पुनले जानकारी दिएका छन्। सशस्त्र प्रहरीले यसअघि पनि विभिन्न स्थानहरूमा लागूऔषध नियन्त्रण अभियान अन्तर्गत सफलतापूर्वक गाँजा र अन्य प्रतिबन्धित वस्तुहरू बरामद गर्दै आएको छ।