सुनबर्षी/मोरङको सुनवर्षी नगरपालिका वडा नं ४, गोल गाउँस्थित श्री जानकी आधारभूत विद्यालयमा ६०औं बालदिवस कार्यक्रम भव्य रूपमा समापन भएको छ। कार्यक्रमका प्रमुख अतिथि वडा नं ४ का वडा अध्यक्ष छेदिया यादव रहेका थिए।

बालदिवसको अवसरमा २०८० सालको अन्तिम परीक्षा उत्तीर्ण गर्ने उत्कृष्ट विद्यार्थीहरूलाई सम्मान गरिएको छ। प्रथम, द्वितीय, र तृतीय स्थान प्राप्त गर्ने विद्यार्थीहरूलाई क्रमशः गोल्ड, सिल्भर, र ब्रोज मेडलसहित प्रमाणपत्र वितरण गरियो। यसले विद्यार्थीहरूमा थप प्रोत्साहनको भावना जगाएको छ।

कार्यक्रमका दौरान विद्यार्थीहरूलाई मनोरञ्जनात्मक खेलहरूमा सहभागिता गराइयो, जसमा हन्डीफोर र स्पुन रेस प्रमुख थिए। साथै, विद्यार्थीहरूले आकर्षक सांस्कृतिक नृत्य तथा गायन प्रस्तुत गरेर कार्यक्रमलाई अझ रमाइलो बनाए।

शिक्षकहरूलाई पनि योगदानको कदरस्वरूप मायाको चिनो प्रदान गरिएको थियो।