विराटनगर / यही असोज ११ र १२ गते देशभर भएको अविरल वर्षाले सार्वजनिक यातायात क्षेत्रमा झण्डै ७३ करोड रुपैयाँ बराबरको क्षति पुर्‍याएको छ। नेपाल यातायात व्यवसायी राष्ट्रिय महासङ्घका अनुसार, वर्षाका कारण कुल ७२ करोड ९८ लाख ८० हजार रुपैयाँ बराबरको क्षति भएको छ।

महासङ्घका अध्यक्ष विजयबहादुर स्वाँरका अनुसार, पश्चिम नेपाल यातायात बस व्यवसायी प्रालिलाई ११ करोड ८८ लाख ८० हजार रुपैयाँ, नमस्ते नेपाल यातायात व्यवसायी प्रालिलाई दुई करोड ८५ लाख रुपैयाँ, र गोरखा दरौंदी यातायात सेवा कम्पनीलाई ६० लाख रुपैयाँ बराबरको क्षति पुगेको छ।

त्यस्तै, बाग्मती टिपर व्यवसायी संघलाई २७ करोड रुपैयाँ, नेपाल ट्रक टिपर व्यवसायी संघलाई २० करोड रुपैयाँ, महाकाली व्यवसायी बहुउद्देश्यीय कम्पनी प्रालिलाई ६ करोड ६५ लाख रुपैयाँ र रसुवागढी नाकामा चार करोड रुपैयाँ बराबरको क्षति भएको छ।

अविरल वर्षाको कारण यातायात व्यवसायीहरू ठूलो आर्थिक संकटमा परेका छन् र यो क्षतिको भरपाईका लागि सरकारले विशेष राहत र सहयोगको पहल गर्नुपर्ने माग उठाइएको छ।