विराटनगर/ नेपाल प्रिमियर लिग (एनपीएल) अन्तर्गत आज शुक्रबार कीर्तिपुरस्थित त्रिभुवन विश्वविद्यालय (त्रिवि) क्रिकेट मैदानमा दुई रोमाञ्चक खेल हुँदैछन्।

पहिलो खेल बिहान ९ बजे कर्णाली याक्स र चितवन राइनोजबीच हुनेछ। कर्णालीले यसअघि खेलेका दुवै खेलमा हार बेहोरेको छ भने चितवन राइनोजले आफ्नो उत्कृष्ट प्रदर्शन जारी राख्दै दुवै खेल जितिसकेको छ। यस खेलले कर्णालीका लागि जितको खोजीको अवसर हुनेछ भने चितवनले आफ्नो अपराजित यात्रा कायम राख्ने लक्ष्य लिनेछ।

दोस्रो खेल दिउँसो १ बजे लुम्बिनी लायन्स र पोखरा एभेन्जर्सबीच हुनेछ। लुम्बिनीले यसअघि खेलेको आफ्नो एक मात्र खेलमा हार बेहोरेको थियो। पोखरा एभेन्जर्स पनि यसअघि खेलेका दुवै खेलमा पराजित भइसकेको छ। दुवै टोली आजको खेलमा पहिलो जितको खोजीमा हुनेछ।

त्रिवि मैदानमा हुने यी खेलहरूले प्रतियोगितामा टोलीहरूको स्थान र मनोबलमा महत्वपूर्ण असर पार्ने अपेक्षा गरिएको छ। क्रिकेटप्रेमीहरूका लागि आजको दिन उत्साहजनक र प्रतिस्पर्धात्मक रहनेछ।