नेवारी समुदायद्वारा विराटनगर, काठमाडौं, हेटौंडा र झापालगायत स्थानहरूमा गाईजात्रा भव्य रूपमा सम्पन्न

मृतात्माको चिरशान्तिको कामना गर्दै नेवारी समुदायले आइतबार बिहान विराटनगर, काठमाडौं, हेटौंडा, झापा लगायतका विभिन्न स्थानहरूमा झाँकीसहित वृहत गाईजात्रा र्याली निकालेका छन्। रंगीचंगी भेषभूषा, मुखुण्डो, परम्परागत वेशभूषा र सांस्कृतिक झाँकीसहितको र्यालीमा सबै उमेरका मानिसहरूको उत्साहजनक सहभागिता रहेको थियो।

विराटनगरमा गाईजात्रा
विराटनगरमा झिःपुचबाट सुरु भएको र्याली संसारीमाई मन्दिर हुँदै मेन रोड, तीनपैनी र पोखरिया हुँदै सम्पन्न भएको थियो। सहभागीहरूले परम्परागत नेवारी बाजा—ढोल, नगाडा, धिमे बजाउँदै नगर परिक्रमा गरेका थिए।
यस अवसरमा स्मरणीय माता स्व. सूर्य कुमारी प्रधानको यही मिति २०८२ साल बैशाख ७ गते स्वर्गारोहण भएको स्मरण गर्दै गाईजात्रा आयोजना गरिएको थियो। कार्यक्रममा उनका छोराहरू प्रदीप राज प्रधान, दीपक राज प्रधान, सन्दीप राज प्रधान, मुन्दीप राज प्रधान र कुलदीप राज प्रधानसहित परिवारजनको सक्रिय उपस्थिति रहेको थियो।

पर्वको महत्व र इतिहास
नेवार समुदायमा गाईजात्रा दिवंगत आत्माको स्मृतिमा आयोजना गरिने प्रमुख सांस्कृतिक पर्व हो। प्रत्येक वर्ष भाद्र कृष्ण प्रतिपदादेखि अष्टमीसम्म आठ दिन मनाइने यो पर्व मूलतः काठमाडौं उपत्यकाबाट सुरु भए पनि अहिले नेवार समुदायको बसोबास भएका देशभरका स्थानहरूमा उतिकै भव्यताका साथ मनाइन्छ। गाई (वा त्यसको प्रतिरूप)लाई अगाडि हिँडाएर नगर परिक्रमा गर्ने यो परम्परालाई मृतात्माको आत्मिक शान्ति र मोक्ष प्राप्तिको प्रतीक मानिन्छ।

हेटौंडामा विशेष कार्यक्रम
हेटौंडामा समाजसेवी सरिता श्रेष्ठकी माता तथा नेपाल ट्रक यातायात व्यवसायी महासंघका केन्द्रीय अध्यक्ष एवं नारायणी यातायात व्यवसायी संघ हेटौंडाका अध्यक्ष हिरालाल श्रेष्ठकी माता स्व. दीलमाया श्रेष्ठको सम्झनामा विशेष गाईजात्रा आयोजना गरिएको थियो।
कार्यक्रममा दिवंगत आत्माको चिरशान्तिको कामना गर्दै शोकसन्तप्त परिवारलाई धैर्य धारण गर्ने शक्ति प्रदान गर्न सामूहिक प्रार्थना गरिएको थियो। श्रेष्ठ परिवारका हिरालाल श्रेष्ठ, उमा श्रेष्ठ, मोतीलाल श्रेष्ठ, सुसिला श्रेष्ठ, धर्मलाल श्रेष्ठ, रामलाल श्रेष्ठ, चित्रा श्रेष्ठ, शुभद्र श्रेष्ठ, डा. किशोरलाल श्रेष्ठ, नतासा श्रेष्ठ, गणेशलाल श्रेष्ठ, शुसिला श्रेष्ठलगायत परिवारजन सहभागी थिए।

झापामा पनि उत्साहपूर्वक मनाइयो
झापामा बिर्तामोड, दमक, भद्रपुरलगायत स्थानहरूमा गाईजात्रा धुमधामका साथ मनाइएको छ। विभिन्न टोलबाट निस्किएका र्यालीमा सहभागीहरूले ढाकाटोपी, हाकुपटासी, गुन्युचोली, परम्परागत गहना र सांस्कृतिक झाँकीसहित सडक परिक्रमा गरेका थिए। बालबालिकादेखि वृद्धवृद्धासम्मको उल्लेख्य सहभागिता रहेको यो कार्यक्रमलाई स्थानीय नेवार समाजका पदाधिकारीहरूले समुदायबीचको एकता, परम्परागत कला, संस्कृति र धार्मिक आस्थाको संरक्षणमा महत्वपूर्ण मानिएको बताए। उनीहरूले नयाँ पुस्तामा सांस्कृतिक चेतना जगाउन आगामी वर्षहरूमा अझ ठूलो स्तरमा आयोजना गर्ने योजनाको जानकारी पनि दिए।