बिहार विधान सभा निर्वाचनका कारण मोरङका सीमा नाका ७२ घण्टाका लागि बन्द हुने
मोरङ । भारतको बिहार विधान सभा आम निर्वाचन–२०२५ का क्रममा मोरङ जिल्लाका विभिन्न सीमा नाका ७२ घण्टाका लागि बन्द हुने भएका छन्।
जिल्ला प्रशासन कार्यालय, मोरङले शुक्रबार जारी गरेको सूचनाअनुसार आगामी कार्तिक २५ गते (११ नोभेम्बर २०२५) मा हुने बिहार विधान सभा निर्वाचनको शान्तिपूर्ण वातावरण कायम राख्नका लागि पूर्व–नेपाल सीमा क्षेत्रमा पर्ने मोरङ जिल्लाभित्रका सबै नाका बन्द गरिने निर्णय भएको हो।
सूचनामा उल्लेख भएअनुसार कार्तिक २२ गते (८ नोभेम्बर २०२५) शनिबार साँझ ५:१५ बजेदेखि मतदान सम्पन्न नहुन्जेलसम्म अर्थात् कार्तिक २५ गते (११ नोभेम्बर २०२५) मङ्गलबार राति मतदान समाप्ति नहुँदासम्म नाका बन्द रहनेछन्।
जिल्ला प्रशासन कार्यालयले आपतकालीन सेवा बाहेक मोरङ जिल्लाका सबै अन्तर्राष्ट्रिय सीमा नाका बन्द हुने भएकाले सर्वसाधारणलाई आवश्यक जानकारीका लागि सतर्क रहन आग्रह गरेको छ।
सूचना सहायक प्रमुख जिल्ला अधिकारी सरोज कोईरालाले हस्ताक्षर गरी जारी गरेका हुन्।