रंगेली/ रंगेली नगरपालिका–५ स्थित ऐतिहासिक श्री राम जानकी मन्दिरमा दानपेटिका फोडेर पैसा चोर्ने प्रयास गर्ने एक व्यक्ति रंगेहात पक्राउ परेका छन्। रातको समयमा मन्दिरको दानपेटी फोड्न खोजिरहेका अवस्थामा स्थानीय युवाहरूले उनलाई नियन्त्रणमा लिएका थिए।

पक्राउ परेका व्यक्तिको साथबाट तार काट्ने कैची, छुरा, र अन्य आपराधिक उपकरणहरू समेत फेला परेको छ। अनुसन्धानका क्रममा उनी रंगेली वार्ड नं. ६, ठाना टोलका निवासी रहेको खुलेको छ। पक्राउपछि उनलाई प्रहरीको नियन्त्रणमा राखिएको छ र हाल चोरीको मुद्दा चलाइएको छ।

 

यस घटनापछि स्थानीय समुदायमा सुरक्षा र धार्मिक स्थलहरूको संरक्षणप्रति थप सजगता देखिएको छ। समाजमा बढ्दो चोरीका घटनाले सर्वसाधारणमा त्रास उत्पन्न गराइरहेको बेला यसपटक स्थानियहरूको सतर्कताले अपराधीलाई तत्कालै नियन्त्रणमा लिन सफल भएको बताइएको छ।

 

पुलिस प्रशासनले घटनापछि थप अनुसन्धान अघि बढाइरहेको र सुरक्षा व्यवस्थालाई कडा पार्ने उपायहरू अपनाइने जानकारी दिएको छ। स्थानीयहरूले पनि यस प्रकारका घटनालाई रोक्न र समुदायको सुरक्षामा सहयोग पुर्‍याउन सबैलाई सचेत रहन आग्रह गरेका छन्।