बिराटनगर /आइतबार सुनसरी सीमामा रहेको सप्तकोशी नदीमा आएको बाढीको बहाव घट्न थालेपछि आइतबारदेखि यातायात पुनः सुचारु भएको छ। बिहानैदेखि कोशी ब्यारेजको पुलमाथि बगिरहेको भेल रोकिएपछि यातायात सञ्चालनमा आएको हो।

पुलमाथि बाढीको पानी घटे पनि पुलमा थेग्रिएको फोहोर र लेदो पन्छाउने काम भइरहेको छ। यसले गर्दा यातायात केहीबेर प्रभावित भए पनि, हाल यात्रा सहज भइरहेको छ।

सप्तकोशी नदीमा इतिहासमै दोस्रो पटक अत्यधिक जलप्रवाह हुँदा ६ लाख ६० हजार क्युसेक पानी बगेको थियो। यसले गर्दा नदी किनारका बस्तीहरूमा सतर्कता अपनाइएको थियो भने कोशी ब्यारेज पुलमा आवागमन रोक्नु परेको थियो।