विराटनगर / काठमाडौँबाट विराटनगरतर्फ आइरहेको हायस (बा ५ ख ६६१८) शुक्रबार सिन्धुलीको सिस्नेरी क्षेत्रमा दुर्घटनाग्रस्त भएको छ। दुर्घटनामा चालकसहित १५ जना घाइते भएका छन्, भने सवारीमा जम्मा १९ जना यात्रु सवार थिए।

सिन्धुली प्रहरीका अनुसार काठमाडौँबाट हेटौँडा हुँदै विराटनगर गइरहेको हायस अनियन्त्रित भई सडकबाट नालामा खसेको हो। दुर्घटनालगत्तै घटनास्थलमा उद्धार कार्य शुरु गरिएको थियो। घाइतेहरुलाई तत्कालै सिन्धुली अस्पतालमा प्रारम्भिक उपचार प्रदान गरियो।

गम्भीर अवस्थामा रहेका घाइतेहरुलाई थप उपचारको लागि धरानस्थित वीपी स्वास्थ्य विज्ञान प्रतिष्ठानमा पठाइएको प्रहरी उपरीक्षक (एसपी) गोविन्दराज काफ्लेले जानकारी दिए। दुर्घटनाको थप अनुसन्धान भइरहेको जनाइएको छ।