विराटनगर/ काँकडभिट्टाबाट काठमाडौंतर्फ जाँदै गरेको रात्रिबसले कमल गाउँपालिका-३, केर्खामा मङ्गलबार साँझ एउटा इलेक्ट्रिक साइकललाई ठक्कर दिँदा हजुरबुवा र नातिनीको घटनास्थलमै मृत्यु भएको छ।

मृत्यु हुनेमा कमल ३ का मनोज लिम्बूकी १२ वर्षकी छोरी कृपा लिम्बू र उनका हजुरबुवा रहेका छन्। विशेष कुरा के हो भने, आज बालिका कृपाको जन्मदिन रहेको र जन्मदिन मनाउन हजुरबुवाले उनलाई लिएर बर्थडे केक र मासु लिन गएका थिए। केक र मासु लिएर फर्किंदै गर्दा उनीहरू सवार साइकललाई बसले ठक्कर दिँदा दुबै जनाको मृत्यु भएको हो। ठक्करपछिको दृश्य दर्दनाक थियो, बर्थडे केक र मासु सडकभरि छरिएका थिए भने इलेक्ट्रिक साइकल पूर्णरूपमा क्षतिग्रस्त भएको थियो।

यो दुर्घटनापछि आक्रोशित स्थानीयहरूले पूर्वपश्चिम राजमार्ग अवरुद्ध गर्दै ठक्कर दिने बसमा तोडफोड गरेका छन्। प्रहरी चौकी केर्खामा राखिएको बसलाई आगजनी गर्ने प्रयाससमेत भएको जनाइएको छ। आक्रोशित भिडले प्रहरी चौकीमा ढुंगामुढा समेत गरेको छ। स्थिति नियन्त्रणमा लिन ठूलो संख्यामा सुरक्षाकर्मी परिचालन गरिएको भए पनि अवस्था तनावग्रस्त रहेको छ।

अहिले स्थानीय र सुरक्षाकर्मीबीचको झडपका कारण क्षेत्रमा सुरक्षा अवस्था थप बलियो पारिएको छ भने राजमार्ग खुलाउने प्रयास भइरहेको छ।