विराटनगर/सुनसरीको बर्जु गाउँपालिका–३ स्थित टेङ्ग्रा खोला किनाराबाट सशस्त्र प्रहरी बल बिओपी (BOP) अमडुवाले ठूलो परिमाणमा गाँजा बरामद गरेको छ। १८२.८१ किलोग्राम गाँजा भारतीय बजारतर्फ लान लागिएको अवस्थामा सशस्त्र प्रहरीले नियन्त्रणमा लिएको हो।

सशस्त्र प्रहरी निरीक्षक प्रकाश विक्रम कार्कीको टोलीले सिमानाको उखुबारी हुँदै भारततर्फ लैजान लागिएको गाँजा बोकेका व्यक्तिहरूलाई फेला पारेको थियो। नम्बर ४ गण हे.क्वाटर, सुनसरीका अनुसार करिब ६ जना संख्यामा रहेका ती व्यक्तिहरूले गाँजा बोरा (पोकामा प्याक गरेर) टाउकामा बोकिरहेका थिए। प्रहरीले नियन्त्रणमा लिन खोज्दा तस्करीमा संलग्न सबै व्यक्ति बोरा छाडेर फरार भएका थिए।

सशस्त्र प्रहरीले घटनाबारे थप अनुसन्धान जारी राखेको जनाएको छ।