विराटनगर/झापाको अर्जुनधारा नगरपालिका वडा नम्बर ६ स्थित शनिश्चरे–बिर्तामोड सडकखण्डमा आज दिउँसो ४ बजेतिर भएको एक मोटरसाइकल दुर्घटनामा चालकको मृत्यु भएको छ। शनिश्चरेबाट बिर्तामोडतर्फ तीव्र गतिमा आउँदै गरेको बा ४९ प २१५९ नम्बरको मोटरसाइकल आफैँ अनियन्त्रित भई सडकको बाँया साइडमा रहेको रुखमा ठोक्किँदा दुर्घटना भएको हो।

दुर्घटनामा परी मोटरसाइकल चालक ताप्लेजुङको श्रीजंघा गाउँपालिका वडा नम्बर ६ का २६ वर्षीय सन्तोष लिम्बूको गम्भीर चोटका कारण मृत्यु भएको छ। टाउको र छातीमा चोट लागेका लिम्बूलाई उपचारको लागि बीएण्डसी अस्पताल पठाइएको थियो, जहाँ चिकित्सकले उनलाई मृत घोषित गरे।
मोटरसाइकलको पछाडि सवार सोही ठाउँका २३ वर्षीय श्रीप्रसाद लिम्बू घाइते भएका छन्, र उनको उपचार बीएण्डसी अस्पतालमा भइरहेको छ। इलाका प्रहरी कार्यालय बिर्तामोडका डीएसपी प्रकाश विष्टका अनुसार दुर्घटना भएका मोटरसाइकललाई प्रहरी चौकी शनिश्चरेमा राखिएको छ। प्रारम्भिक जानकारी अनुसार चालकले मादक पदार्थ सेवन गरेको आशंका गरिएको छ।