विराटनगर /जिल्ला प्रहरी कार्यालय झापाले शनिबार साझँ लागूऔषधसहित एकजनालाई पक्राउ गरेको छ। मेचीनगर नगरपालिका वडा नं. ६, पुरानो मेची पुल क्षेत्रमा लागूऔषध नियन्त्रण व्यूरो काँकडभिट्टाबाट खटिएको प्रहरी टोलीले भारतको पानीट्याङ्कीबाट पैदल नेपालतर्फ आइरहेका कनकाई नगरपालिका-६, झापाका ३४ वर्षीय बिक्रम हस्दालाई शंका लागि तलासी गर्दा लागूऔषध फेला परेको हो।
प्रहरीका अनुसार हस्दाको मलद्धारमा प्लास्टिकमा प्याक गरिएको ६ ग्राम ७४० मिलिग्राम (प्लास्टिक बाहेक ५ ग्राम ६०० मिलिग्राम) खैरो हेरोइन जस्तो देखिने लागूऔषध भेटिएको थियो। हस्दालाई नियन्त्रणमा लिएर थप अनुसन्धानका लागि इलाका प्रहरी कार्यालय काँकडभिट्टामा राखिएको डिएसपी कृष्णकुमार चन्दले जानकारी दिएका छन्।
पक्राउ परेका हस्दामाथि कानुनी कारबाही प्रक्रिया अगाडि बढाइएको प्रहरीले जनाएकोछ।