विराटनगर / मोटरसाइकलको ठक्करबाट घाइते बालकको मृत्यु भएपछि फरार भएका झापा, कन्काई नगरपालिका–५, मुस्लिम टोलका २३ वर्षीय अजत मियालाई प्रहरीले पक्राउ गरेको छ।

इलाका प्रहरी कार्यालय बिर्तामोडका डिएसपी प्रकाश विष्टका अनुसार मियालाई सोमबार राति ११ बजे बाह्रदशीको चकचकीबाट नियन्त्रणमा लिइएको हो।

सोमबार बिहान ११ बजेतिर कन्काई–५ चप्रामारीको भित्री कच्ची सडकखण्डमा मियाले चलाएको मे ११ प ३३८ नम्बरको मोटरसाइकलले बाटोमा खेलिरहेका सोही ठाउँका विनोद पाठकका ७ वर्षीय छोरा सोहनलाई ठक्कर दिएको थियो। बालक गम्भीर घाइते भएपछि उपचारका लागि बिर्तासिटी अस्पताल पुर्याइएको थियो, जहाँ चिकित्सकले उनलाई मृत घोषित गरे।

दुर्घटनापछि मिया फरार भएका थिए भने मोटरसाइकल इलाका प्रहरी कार्यालय सुरुङ्गाको नियन्त्रणमा रहेको डिएसपी विष्टले जनाएका छन्।