विराटनगर /कात्तिक १५ गते लक्ष्मी पूजाको दिनदेखि सोमबारसम्मको पाँच दिनको अवधिमा झापामा सवारी दुर्घटनाबाट चार जनाको मृत्यु भएको छ भने ५२ जना घाइते भएका छन्। जिल्ला ट्राफिक प्रहरी कार्यालयले दिएको जानकारीअनुसार, यस अवधिमा ३१ वटा सवारी दुर्घटना भएका थिए। तिहार पर्वको समयमा धेरैजसो दुर्घटनामा मोटरसाइकलको संलग्नता देखिएको छ।

सोमबार बिहान बालकको मृत्यु

सोमबार बिहान करिब ११ बजेको समयमा कन्काई–५, चप्रामारीमा मे ११ प ३३८ नम्बरको मोटरसाइकलले बाटोमा खेलिरहेका ७ वर्षीय बालक सोहन पाठकलाई ठक्कर दिएको थियो। गम्भीर घाइते बालकलाई तत्कालै बिर्तासिटी अस्पताल पुर्याइए पनि, अस्पतालमा पुर्याउनासाथ चिकित्सकले मृत घोषणा गरेका थिए।

साइकलयात्री गणेश खड्काको मृत्यु

त्यस्तै, कात्तिक १६ गते साँझ ६:१० बजे पूर्व–पश्चिम राजमार्गअन्तर्गत शिवसताक्षी नगरपालिका–११ स्थित कृष्ण मन्दिरनजिक काँकडभिट्टाबाट धरानतर्फ जाँदै गरेको बसले ६१ वर्षीय साइकलयात्री गणेश खड्कालाई ठक्कर दिएको थियो। गम्भीर घाइते खड्काको बीएण्डसी अस्पतालको भेन्टिलेटरमा राखेर उपचार गरिए पनि सोमबार बिहान मृत्यु भएको थियो।

मोटरसाइकल ठक्करबाट घाइते बालकको निधन

त्यस्तै, सोही दिन साँझ ६:३० बजे झापा गाउँपालिका वडा नम्बर ६ स्थित भित्री सडकखण्डमा पैदलयात्री ४० वर्षीय कमनसिंह लिङ्खा र उनका ७ वर्षीय छोरा अस्मिन लिङ्खालाई मोटरसाइकलले ठक्कर दिएको थियो। दुबै जना घाइतेको बीएण्डसी अस्पतालमा उपचार भइरहेकामा अस्मिनको सोमबार बिहान निधन भएको थियो।

मोटरसाइकल दुर्घटनामा युवकको ज्यान

कात्तिक १६ गते अर्जुनधारा नगरपालिका वडा नम्बर ६ स्थित शनिश्चरे–बिर्तामोड सडकखण्डमा, तीव्र गतिमा बिर्तामोडतर्फ आइरहेको मोटरसाइकल अनियन्त्रित भई रुखमा ठोक्किँदा २६ वर्षीय सन्तोष लिम्बूको मृत्यु भएको थियो।

तिहार अवधिमा ट्राफिक प्रहरीले ६६४ वटा सवारीसाधनमाथि कारवाही गर्दै ३ लाख ९९ हजार ५०० रुपैयाँ राजस्व संकलन गरेको जनाएको छ।