विराटनगर। “कर प्रणालीको सार, लगानीको आधार” भन्ने मूलनाराका साथ शनिबारदेखि १३औं राष्ट्रिय कर दिवस तथा कर सप्ताह सुरु भएको छ। आन्तरिक राजस्व कार्यालय विराटनगरले आयोजना गरेको कर सप्ताह मंसिर १ गते सुरु भई मंसिर ७ गते सम्पन्न हुनेछ।

आन्तरिक राजस्व कार्यालय विराटनगरका प्रमुख कर अधिकृत भुपालराज शाक्यको अध्यक्षतामा सम्पन्न उद्घाटन समारोहमा मोरङका प्रमुख जिल्ला अधिकारी प्रेमप्रसाद भट्टराई, विराटनगर भन्सार कार्यालयका प्रमुख भन्सार अधिकृत ज्ञानेन्द्रराज ढकाल, संघीय कोष तथा लेखा नियन्त्रण कार्यालय मोरङका प्रमुख टोमनाथ उप्रेती, नेपाल उद्योग परिसंघ कोशी प्रदेशका उपाध्यक्ष दिपक पौडेल, उद्योग संगठन मोरङका अध्यक्ष राकेश सुराना, मोरङ उद्योग व्यापार संघका वरिष्ठ उपाध्यक्ष अनिल साह, र विराटनगर व्यापार संघका अध्यक्ष अंशु बन्जारालगायतले शुभकामना मन्तव्य व्यक्त गरेका थिए। कार्यक्रमअघि प्रभात फेरी पनि आयोजना गरिएको थियो।

कर सप्ताहको अवसरमा आन्तरिक राजस्व कार्यालय विराटनगरले विभिन्न कार्यक्रमको आयोजना गरेको छ:

मंसिर २ (आइतबार): पहिलो सेवा ग्राहीलाई सम्मान।

मंसिर ३ (सोमबार): हाजिरी जवाफ प्रतियोगिता।

मंसिर ४, ५, र ६ (मंगलबारदेखि बिहीबारसम्म): विराटनगरका विभिन्न स्थानमा खुला करदाता शिक्षा कार्यक्रम।

मंसिर ७ (शुक्रबार): समापन समारोहमा उत्कृष्ट करदाता र उत्कृष्ट कर्मचारीलाई सम्मान।

कार्यक्रमको माध्यमबाट कर प्रणालीप्रति नागरिक र व्यवसायीहरूलाई सचेत गराउने तथा कर तिर्ने संस्कृतिलाई प्रोत्साहित गर्ने उद्देश्य राखिएको छ। करदाता शिक्षाका विभिन्न कार्यक्रममार्फत आम नागरिकलाई करको महत्त्वबारे जानकारी दिइने बताइएको छ।

१३औं राष्ट्रिय कर दिवसले आर्थिक व्यवस्थापनमा योगदान पुर्‍याउँदै आर्थिक पारदर्शिताको महत्त्वलाई अझ प्रभावकारी बनाउने अपेक्षा गरिएको छ।