विराटनगर/ विराटनगर–७ स्थित मालपोत कार्यालयको कम्पाउन्डभित्र दुई पसलमा आगलागी भएको छ।

हिजो साँझ ६:३० बजे अमित साहले सञ्चालन गरेको चिया पसल र सुमन कार्कीको फोटोकपी पसलमा आगलागी भएको हो। प्रारम्भिक जानकारीअनुसार कार्कीको फोटोकपी पसलमा लाइन सर्ट भई आगलागी भएको थियो।

आगलागीबाट कार्कीको दुई थान ल्यापटप, एक थान फोटोकपी मेसिन, अमित साहको ग्यास सिलिन्डर (पड्केको), र फर्निचर लगायत सम्पूर्ण सामग्री जलेर नष्ट भएका छन्।

स्थानीयवासी, विराटनगर महानगरपालिकाका दुईवटा दमकल, र नेपाल प्रहरीको सहयोगमा आगो साँझ ७ बजे नियन्त्रणमा आएको थियो।

आगलागीबाट ठूलो आर्थिक क्षति भएको अनुमान गरिएको छ। घटनाको विस्तृत अनुसन्धान भइरहेको प्रहरीले जनाएको छ।