विराटनगर/ प्रहरी हिरासतमा रहेका व्यवसायी दुर्गा प्रसाईंले आफ्ना समर्थकलाई सम्बोधन गर्दै लामो पत्र सार्वजनिक गरेका छन्। आफ्नो हिरासत अनुभव, सरकारप्रति असन्तुष्टि, र बिपी कोइरालाप्रति सम्मानका साथ उनले पत्रमार्फत आफ्नो धारणा व्यक्त गरेका हुन्। उक्त पत्र उनका समर्थकले सचिवालयमार्फत उनको आधिकारिक फेसबुक पेजबाट सार्वजनिक गरेका हुन्।
प्रसाईंले हिरासतको अनुभवबारे लेख्दै भनेका छन्, “हिरासत नजाँदासम्म सरकारले सत्य बोलेकालाई सजाय दिन कहिले आउँछ भन्ने कौतुहलता हुँदोरहेछ। हिरासतमा आइसकेपछि त्यो कौतुहलता मेटिएर मनमा अनगिन्ती प्रश्नले पिरोल्ने रहेछ।”
हिरासतमा रहँदा उनले बिपी कोइरालाको आत्मवृत्तान्त अध्ययन गरेको उल्लेख गर्दै भनेका छन्, “बिपीले दक्षिण एसियाली नागरिकको मुक्तिका लागि आफ्नो जीवन समर्पित गरेको तथ्यले मलाई उहाँप्रति असीमित सम्मान जाग्यो।” उनले बिपीको योगदान र विचारप्रति गहिरो प्रेरणा महसुस गरेको बताएका छन्।
प्रसाईंले प्रधानमन्त्री केपी शर्मा ओलीसँग जोडिएको भनिएको कम्बोडियाको लगानीबारे आफूले प्रमाणसहित सार्वजनिक गरेको दाबी गरेका छन्। उनले आफ्ना प्रमाणलाई १०० प्रतिशत सत्य भन्दै यसबारे गहिरो छानबिनको माग गरेका छन्।