विराटनगर / बिर्तामोड नगरपालिका–६ मा गएराति भएको आगलागीले ठूलो क्षति पुर्याएको छ। मसाले टोल निवासी अर्जुन थलानको परालको थुप्रोमा राति १:४० बजे अचानक आगलागी हुँदा नजिकै रहेको पञ्चसेवा ग्यारेजमा मर्मतका लागि राखिएको एउटा टिपर पनि जलेर नष्ट भएको छ।
जलेको टिपर सक्षम निर्माण सेवाको बा.०३–००१ क ०३३१ नम्बरको रहेको र त्यसको अगाडिको भाग पूर्ण रूपमा नष्ट भएको जिल्ला प्रहरी कार्यालयले जनाएको छ। आगलागीका कारण करिब १० लाख रुपैयाँ बराबरको क्षति भएको प्रारम्भिक अनुमान गरिएको छ।
इलाका प्रहरी कार्यालय बिर्तामोड र अस्थायी प्रहरी चौकी बुट्टाबारीबाट खटिएको प्रहरी टोली तथा स्थानीयको सहयोगमा आगो राति २:३० बजे पूर्ण रूपमा नियन्त्रणमा लिइएको थियो। आगलागीको कारण भने हालसम्म खुल्न सकेको छैन, र घटनाबारे थप अनुसन्धान भइरहेको प्रहरीले जनाएको छ।