विराटनगर / मोरङको रंगेली–८ मा ट्र्याक्टर दुर्घटना हुँदा चालकको घटनास्थलमै मृत्यु भएको छ। मङ्सिर १४ गते दिउँसो करिब २ बजे को २ त ३१७२ नम्बरको ट्र्याक्टर खेत जोतेर फर्किने क्रममा फर्सा डाङ्गी पेट्रोल पम्पबाट करिब ५०० मिटर पश्चिमतिर दुर्घटनाग्रस्त भएको हो।

दुर्घटनामा रंगेली–८ निवासी ३० वर्षीय लाला हेमरमको ज्यान गएको जिल्ला प्रहरी कार्यालय मोरङले जानकारी दिएको छ। ट्र्याक्टर पल्टिँदा गम्भीर घाइते भएका हेमरमलाई स्थानीयले उद्धार गर्ने प्रयास गरे पनि उनको घटनास्थलमै मृत्यु भएको प्रहरीले जनाएको छ।

ट्र्याक्टर अनियन्त्रित भएर पल्टिएको आशंका गरिए पनि दुर्घटनाको वास्तविक कारण पत्ता लगाउन प्रहरीले थप अनुसन्धान गरिरहेको छ।

स्थानीयहरूले घटनाप्रति दुःख व्यक्त गर्दै यस्ता दुर्घटनाबाट बच्न ट्र्याक्टर चालकले विशेष सतर्कता अपनाउनुपर्ने बताएका छन्।