विराटनगर /  नेपाल प्रिमियर लिग (एनपीएल) क्रिकेटमा जनकपुर बोल्ट्सले लगातार दोस्रो जित दर्ता गरेको छ। आज कीर्तिपुरस्थित टियु क्रिकेट मैदानमा भएको खेलमा जनकपुरले कर्णाली याक्सलाई ८ विकेटले पराजित गर्दै शानदार प्रदर्शन जारी राख्यो।

कर्णाली याक्सले दिएको १४२ रनको लक्ष्य जनकपुरले मात्र १५.१ ओभरमा २ विकेटको क्षतिमा पूरा गर्‍यो। जनकपुरका कप्तान अनिल शाहले नटआउट रहँदै ६२ रनको उत्कृष्ट इनिङ्स खेले। उनलाई आसिफ शेखले ३६ रनको योगदान गर्दै साथ दिए। कर्णालीका मौसम ढकाल र जीशान मक्सूदले जनकपुरका १-१ विकेट लिएका थिए।

टस जितेर ब्याटिङ गरेको कर्णाली याक्सले २० ओभरमा ७ विकेट गुमाउँदै १४१ रन बनाएको थियो। कर्णालीका गुल्सन झाले ३६ रन, अर्जुन घर्तीले ३३ रन, र कप्तान सोमपाल कामीले नटआउट २९ रन बनाए। भारतीय खेलाडी शिखर धवन १४ रनमा आउट भए। जनकपुरका बलर मोहम्मद मोहसिनले २ विकेट लिए।

यसअघि, जनकपुरले उद्घाटन खेलमा विराटनगर किङ्ग्सलाई पराजित गरेको थियो। यस जितसँगै जनकपुर बोल्ट्सले प्रतियोगितामा उत्कृष्ट लय समातेको छ।