विराटनगर/ झापा गाउँपालिका वडा नं. ६ पुष्पाञ्जली टोलमा ८३ वर्षीया फुलमाया मुर्मूको हत्याको आरोपमा दुईजना पक्राउ परेका छन्। प्रहरीले झापा गाउँपालिका वडा नं. ७ बस्ने २८ वर्षीय अजय यादव र शिवसताक्षी नगरपालिका वडा नं. ७ बस्ने २४ वर्षीय अशोक यादवलाई पक्राउ गरेको हो।

घरमा एक्लै रहेका बेला लुटपाट गर्ने उद्देश्यले पुगेका यादवद्वयले कलको ह्याण्डिल र फरुवाले प्रहार गरी वृद्धाको हत्या गरेको प्रहरीले जनाएको छ। हत्या गरिसकेपछि शव गाईवस्तुको घाँस खाने डुँडमा परालले छोपेर लुकाइएको थियो। उनीहरुले वृद्धाको घरबाट सामसुङ र कलर्स ब्रान्डका दुईवटा मोबाइल पनि लुटेका थिए।

जिल्ला प्रहरी कार्यालय झापा तथा प्रदेश प्रहरी कार्यालय केनाइन शाखा, धरानबाट आएको कुकुरसहितको टोलीको सहकार्यमा घटनाको अनुसन्धान भइरहेको छ। लुटिएको मोबाइल र साइकलसहित झापा गाउँपालिका वडा नं. ७ मदरगाछबाट पक्राउ परेका अभियुक्तहरुलाई थप अनुसन्धानका लागि जिल्ला प्रहरी कार्यालय झापामा राखिएको छ।

पक्राउ परेका दुवै अभियुक्त लागूऔषध दुर्व्यसनी रहेको र लागूऔषध किन्न रकम जुटाउनकै लागि लुटपाट गरेको हुनसक्ने आशंका गरिएको छ।

घटनाको एक दिन अघि मृतक मुर्मूले आफ्नो जग्गा बिक्री गरी एक लाख रुपैयाँ लिएकी थिइन्। प्रहरीले उक्त रकम लुट्नकै लागि हत्या गरिएको हुनसक्ने अनुमान गरेको छ।

घटनामा संलग्न भएको आशंकामा झापा गाउँपालिका वडा नं. ७ बस्ने पवनलाल राजवंशी (२७) र उनका भाइ धनलाल राजवंशी (२३)लाई पनि नियन्त्रणमा लिइएको प्रहरीले जानकारी दिएको छ।

घटना सम्बन्धी थप अनुसन्धान जारी रहेको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिएका छन्।