विराटनगर/ प्रधानमन्त्री एवं नेकपा (एमाले) का अध्यक्ष केपी शर्मा ओलीलाई आइतबार झापाको मेचीनगरमा राष्ट्रिय स्वतन्त्र पार्टी (रास्वपा)का कार्यकर्ताले कालो झण्डा देखाएर विरोध प्रदर्शन गरेका छन्।

मेचीनगर इँट्टाभटा नजिक रास्वपाका कार्यकर्ताले प्रधानमन्त्रीविरुद्ध प्रदर्शन गर्दै “राजनीतिक प्रतिशोध बन्द गर” र “प्रहरी दमन मुर्दावाद” जस्ता नारा लगाएका थिए। विरोध प्रदर्शन प्रधानमन्त्रीको पछिल्लो राजनीतिक कदम र सुरक्षा निकायको गतिविधिको विरोधमा गरिएको बताइएको छ।

प्रदर्शनका क्रममा प्रहरीले रास्वपाका झापा क्षेत्र नम्बर ४ का सभापति शम्भु सुस्केरा सहित केही कार्यकर्तालाई नियन्त्रणमा लिएको छ। प्रहरीले नियन्त्रणमा लिएका प्रदर्शनकारीहरूसँग थप अनुसन्धान भइरहेको जानकारी दिएको छ।

रास्वपाका कार्यकर्ताले ओली नेतृत्वको सरकारविरुद्ध राजनीतिक प्रतिशोधको आरोप लगाउँदै झापामा विरोध प्रदर्शन गरेका हुन्। उनीहरुले झापा क्षेत्रमै प्रदर्शन गरी सरकारप्रति असहमति जनाएका छन्।

यो घटना प्रधानमन्त्रीको गृहजिल्लामा भएको विरोधका रूपमा देखिएको छ, जसले स्थानीयस्तरमा राजनीतिक असन्तोषको संकेत दिएको छ।