विराटनगर/ झापाको मेचीनगर–१४ प्रणामीनगर टोलमा रहेको मदरसा मझारे सरिफ मा गएराति आगलागी भएको छ। राति १२:१० बजेतिर एकतले पक्की र माथि टिनको छाना भएको मदरसाको सभाहलमा कोही नभएको अवस्थामा अचानक आगलागी भएको हो।

आगो स्थानीयवासी, प्रहरी चौकी चारआलीबाट खटिएको प्रहरी टोली, र मेचीनगर तथा भद्रपुर नगरपालिकाको दमकलको सहयोगमा राति १२:३० बजे पूर्णरूपमा नियन्त्रणमा लिइएको थियो।

आगलागीबाट मदरसाको सभाहल आंशिक रूपमा जलेर अन्दाजी ३ लाख रुपैयाँ बराबरको क्षति भएको जिल्ला प्रहरी कार्यालय, झापाले जनाएको छ।

आगो लाग्नको कारणबारे अनुसन्धान भइरहेको प्रहरीको भनाइ छ। स्थानीयहरूले आगलागीबाट थप ठूलो क्षति हुन नदिन त्वरित प्रयास गरेकाले आगो समयमा नियन्त्रणमा आएको हो।