विराटनगर/ काठमाडौं महानगरपालिकाका पूर्वमेयर तथा पूर्वमन्त्री पिएल सिंहको ८५ वर्षको उमेरमा निधन भएको छ। सिंहको निधन ठमेलस्थित चाक्सीबारीको आफ्नै निवासमा भएको हो।

सिंह लामो समयदेखि आन्द्राको समस्याबाट पीडित थिए। २०४९ सालको स्थानीय निर्वाचनमा विजयी हुँदै उनी काठमाडौं नगरपालिकाका मेयर बनेका थिए। पञ्चायत व्यवस्थापछि सिंह काठमाडौंका पहिलो मेयरका रूपमा निर्वाचित भएका थिए।

उनको निधनको खबरले काठमाडौं महानगरपालिका शोकमा छ। सिंहको योगदानको सम्मानस्वरूप महानगरपालिकाले शोक विदा घोषणा गरेको छ।

पूर्वमेयर सिंहको निधनप्रति काठमाडौं महानगर, विभिन्न राजनीतिक दल, र सर्वसाधारणले गहिरो दुःख व्यक्त गरेका छन्। उनका परिवारजनप्रति हार्दिक समवेदना व्यक्त गर्दै सिंहको आत्माको चिरशान्तिको कामना गरिएको छ।