विराटनगर/ नेपाल जेसीजको ५१औँ राष्ट्रिय महाधिवेशन सुनसरीको इटहरीमा हुने भएको छ। इटहरी जेसीजको आयोजनामा आउँदो पुस ६ गतेदेखि ८ गतेसम्म महाधिवेशन आयोजना गरिने छ।

आज मंगलबार आयोजित पत्रकार सम्मेलनमा आयोजकले महाधिवेशनको अन्तिम तयारी भइरहेको जानकारी गराउँदै उद्घाटन प्रधानमन्त्री केपी शर्मा ओलीले गर्ने तय भएको जनाएको छ। महाधिवेशन इटहरी–९ स्थित जनता माध्यमिक विद्यालयको खेल मैदानमा हुनेछ।

महाधिवेशनमा देशभरका १७८ शाखाबाट करिब ५ हजार जेसीज सदस्यहरूको सहभागिता रहने महाधिवेशन निर्देशक दीपक ढकालले जानकारी दिए।

महाधिवेशनका कार्यक्रमहरूमा प्रकरण गोष्ठी, शान्ति पदयात्रा, वक्तृत्वकला प्रतियोगिता, पूर्व अध्यक्षहरूको ब्याडमिन्टन प्रतियोगिता र वार्षिक साधारण सभा आयोजना गरिनेछ। साथै, महाधिवेशनबाट सन् २०२५ का लागि राष्ट्रिय अध्यक्षसहितका नयाँ पदाधिकारीहरू चयन हुने जनाइएको छ।

इटहरी जेसीजले सफल र भव्य महाधिवेशनका लागि सम्पूर्ण तयारी पूरा भएको जनाएको छ।