विराटनगर / सशस्त्र प्रहरी बलले सुनसरीको धरान उपमहानगरपालिका-१३ शिवधारास्थित कोशी लोकमार्गबाट करिब १९० किलोग्राम गाँजा बरामद गरेको छ।
भेडेटारबाट धरानतर्फ जाँदै गरेको बा १० च ६८५२ नम्बरको कारको डिक्कीमा प्लास्टिकले प्याक गरी ल्याउँदै गरेको अवस्थामा उक्त गाँजा फेला परेको सशस्त्र प्रहरी बल, नेपाल सुरक्षा बेस धरानका सहप्रवक्ता डिएसपी शैलेन्द्र थापाले जानकारी दिएका छन्।
गाडी चेकजाँचका क्रममा चालकले कार छाडेर भागेको थियो। सोही क्रममा उक्त कारलाई पछ्याउँदै आएको को ३५ प २०४५ नम्बरको मोटरसाइकलमा सवार २ जनालाई पनि गाँजा तस्करीमा संलग्न रहेको आशंकामा नियन्त्रणमा लिइएको छ।
बरामद गरिएको गाँजा, कार, मोटरसाइकल र पक्राउ परेका व्यक्तिहरूलाई थप आवश्यक कानुनी कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ।
सशस्त्र प्रहरी बलको सक्रियताका कारण लागूऔषध ओसारपसारमा संलग्न गिरोहलाई नियन्त्रणमा लिन सहयोग पुगेको छ।
