विराटनगर/ सोमबार साँझ विराटनगर-१३ कोशी प्रोजेक्ट क्षेत्रमा सिटी सफारी दुर्घटना हुँदा चार जना घाइते भएका छन्। प्र १-०२-००४ ह ३२८९ नम्बरको सिटी सफारी आफै अनियन्त्रित भएर दुर्घटनामा परेको थियो।

दुर्घटनामा सिराहा विष्णुपुर गाउँपालिका-१ निवासी २९ वर्षीय मनोज यादव र १८ वर्षीया मनिषा यादव सामान्य घाइते भएका छन्। प्रहरीले जनाएको अनुसार उनीहरूको हातमा चोट लागेको छ। त्यस्तै, विराटनगर-८ निवासी २७ वर्षीया अनिता साह र विराटनगर-१३ निवासी ६१ वर्षीय सियानन्द यादव पनि दुर्घटनामा घाइते भएका छन्। उनीहरूको हात र खुट्टामा चोट लागेको प्रहरीले जानकारी दिएको छ।

घाइतेहरूलाई तत्काल उपचारका लागि कोशी अस्पताल पठाइएको छ। दुर्घटनामा परेको सिटी सफारी बुढीगङ्गा गाउँपालिका-३ निवासी ३६ वर्षीय चालक बिन्दुराज महतोले चलाएका थिए। प्रहरीका अनुसार चालकसँग सफारी चलाउने अनुमति पत्र थिएन। अहिले दुर्घटनामा परेको सिटी सफारी प्रहरीको नियन्त्रणमा राखिएको छ।