विराटनगर/ विराटनगरको प्रमुख सांगितिक महोत्सव “Biratnagar Music Festival-2081” को तेह्रौं संस्करण २०८१ साल कात्तिक १० गते शनिबार जैन भवनको खुल्ला मैदानमा आयोजना गरिने भएको छ। दशै, तिहार र छठ पर्वको अवसरमा आयोजना गरिने यस महोत्सवले दर्शकलाई मनोरञ्जन प्रदान गर्दै सामाजिक सद्भाव बढाउन महत्वपूर्ण भूमिका खेल्ने अपेक्षा गरिएको छ।

यो महोत्सव विराटनगरको सबैभन्दा ठूलो सांगितिक कार्यक्रमको रूपमा परिचित छ। यसमा ख्याति प्राप्त राष्ट्रिय कलाकारहरूको प्रस्तुति रहनेछ। यस वर्ष चर्चित गायक स्वूप्न सुमन एन्ड द एस्टर्स र पूर्ण राई एन्ड दाजुभाइहरु मुख्य आकर्षणका रूपमा प्रस्तुत हुनेछन्। साथै, स्थानीय प्रतिभाहरू Biratnagar Musician Group र स्थानीय डान्स क्लबहरूको नृत्य प्रदर्शन पनि रहनेछ।

कार्यक्रमलाई भव्य बनाउन अन्तर्राष्ट्रिय स्तरको साउन्ड सिस्टम, स्टेज, लाइट र एलईडी स्क्रिनको प्रयोग गरिनेछ। सुरक्षाका लागि जिल्ला प्रशासन कार्यालय मोरङको स्वीकृति लिइएको छ, र नेपाल प्रहरी तथा स्थानीय सुरक्षा गार्डहरूको उपस्थिति रहनेछ। कार्यक्रमको अनुमानित लागत १४ लाख रुपैयाँ रहेको छ। प्रि-सेल टिकट २०० रुपैयाँमा उपलब्ध हुनेछ भने कार्यक्रमको दिन डोर सेल टिकट ३०० रुपैयाँमा बिक्री गरिनेछ।