विराटनगर/ हालैको बाढीपहिरोबाट प्रभावित भएकाहरुलाई तत्काल राहत उपलब्ध गराउन माग गर्दै नेपाली कांग्रेस कोशी प्रदेशले आज मुख्यमन्त्री हिक्मत कुमार कार्कीलाई ज्ञापनपत्र बुझाएको छ।
काङ्ग्रेसको तर्फबाट सभापति एवं संसदीय दलका नेता उद्धव थापाद्वारा हस्ताक्षरित ज्ञापनपत्रमा असोज ९ देखि १२ गतेसम्म परेको अविरल वर्षाका कारण कोशी प्रदेशमा मात्र २० जनाको मृत्यु, ७ जना बेपत्ता र ६२१ घरपरिवार विस्थापित भएको उल्लेख गरिएको छ। ज्ञापनपत्रमा मृतकका परिवारलाई राहत, घाईतेलाई निशुल्क उपचार, बेपत्ताको खोजी र विस्थापितहरुको पुनर्स्थापनाका लागि तत्काल कदम चाल्न आग्रह गरिएको छ।
ज्ञापनपत्र बुझाउने क्रममा काङ्ग्रेस कोशी प्रदेशका प्रवक्ता यदु बिष्टले विपत्तिको यो घडीमा प्रदेश सरकारले तुरुन्तै र प्रभावकारी कदम चाल्नुपर्ने आवश्यकता औँल्याए। विशेष गरी चाडपर्वको समयमा आएको यस प्राकृतिक विपत्तिले थप चुनौती सिर्जना गरेको र यसले प्रभावित नागरिकहरुको जीवन कष्टकर बनाएको बिष्टले बताए।
मुख्यमन्त्री कार्किले ज्ञापनपत्र स्वीकार्दै आज दिउँसो बस्ने मन्त्रीपरिषद बैठकमा मृतकका परिवारलाई राहत, घाइतेको उपचार र भौतिक संरचनाको पुनर्निर्माणका लागि ठोस निर्णय लिने प्रतिबद्धता व्यक्त गरेका छन्।