विराटनगर / माछापुच्छ्रे बचत तथा ऋण सहकारी संस्थाको ९ करोडभन्दा बढी रकम हिनामिना गरेको आरोपमा सहकारीका अध्यक्ष अमलेश कर्णसहित १०९ जनाविरुद्ध मुद्दा दायर भएको छ। जिल्ला सरकारी वकिलको कार्यालयले सहकारीका उपाध्यक्ष सनातम मण्डल, सचिव उत्तम ढुंगेल, कोषाध्यक्ष सोमी भगत र सञ्चालक प्रभाकर थापासहितका पदाधिकारी तथा ८८ ऋणीलाई प्रतिवादी बनाएको हो।

प्रदेश सरकारी रजिष्ट्रार तथा प्रशिक्षण कार्यालयले छानबिन गर्दा सहकारीको ९ करोड २५ लाख रुपैयाँ हिनामिना भएको पाइएको थियो भने प्रहरी अनुसन्धानका क्रममा ७ करोड ८४ लाख २६ हजार ३३५ रुपैयाँ हिनामिना भएको देखिएको छ।

प्रहरीमा १०३ जना बचतकर्ताले २ करोड ४२ लाख ६ हजार ७ सय ५१ रुपैयाँ फिर्ताको माग गर्दै निवेदन दिएका छन्। अभियोग पत्रमा सहकारीले १८३ जनालाई ६ करोड ३४ लाख ७६ हजार २२६ रुपैयाँ ऋण दिएको तर केही ऋणीहरूले ऋण नतिरेको विवरण छ, जसका कारण उनीहरूलाई पनि प्रतिवादी बनाइएको छ।

सहकारीका अध्यक्ष कर्ण पक्राउ परेका छन् भने अन्य २१ जना पदाधिकारीहरू फरार रहेको बताइएको छ। कर्णले संस्थाका अन्य पदाधिकारीहरूजस्तै प्रभाकर थापा, अमित कार्की, र गोपाल ढकाल लगायतले नियमविपरित ऋण लिएको बयान दिएका छन्।

अहिले यो प्रकरणमा थप अनुसन्धान भइरहेको छ।